|
|
ԻՆԺԵՆԵՐԱԿԱՆ ՔԱՂԱՔ
ԻՆԺԵՆԵՐԱԿԱՆ ՔԱՂԱՔ
Ինժեներական քաղաքը պետություն-մասնավոր գործընկերության հենքով ծրագիր է, որն իրականացվում է «Ձեռնարկությունների ինկուբատոր» հիմնադրամի, ՀՀ կառավարության, Համաշխարհային բանկի, ՀՀ բարձր տեխնոլոգիական արդյունաբերության նախարարության և մասնավոր հատվածի համագործակցությամբ և աջակցությամբ։
«Ինժեներական քաղաք» նախաձեռնության նպատակն է Հայաստանում Ինժեներական քաղաքի հիմնման միջոցով նպաստել Ինժեներական և Բարձր տեխնոլոգիաների (ԻԲՏ) ոլորտի հետագա զարգացմանը` խթանելով Հայաստանում տնտեսության մրցունակության և արտադրողականության բարձրացումը:
Ծրագրի նպատակներն են՝
- Հայաստանի ինժեներական կլաստերի ձևավորում՝ ոլորտի դերակատարների համագործակցության և կապերի ստեղծման դյուրացում, համատեղ արտադրության/ռեսուրսների լաբորատորիաների գործարկում,
- ժամանակակից ենթակառուցվածքի ստեղծում, որը ներառում է Ինժեներական բիզնես աքսելերատոր և համատեղ աշխատանքային տարածք, Ինժեներական կենտրոն-ինժեներական պլազա, Գիտության և տեխնիկայի թանգարան, Տիեզերքի թանգարան և ԻՔ-ում տեղակայված ռեզիդենտ ընկերությունների շենքեր,
- ԻՔ-ում կառույցների, լաբորատորիաների և համատեղ օգտագործվող ռեսուրսների տարածքների ձևավորում և հագեցում,
- բարձր տեխնոլոգիական մրցակցային լուծումների «արտադրության» և ձեռնարկությունների վերաբերյալ գիտելիքի կենտրոնացում, ձեռնարկություններին հետագա զարգացման համար աջակցության տրամադրում,
- ժամանակակից սարքավորումներով և տեխնոլոգիաներով հագեցած համատեղ օգտագործվող ռեսուրսների և աջակցող ենթակառուցվածքի տրամադրում, որոնք հասանելի չեն և թանկարժեք են առանձին ընկերությունների համար,
- աշխարհահռչակ տեխնոլոգիական համալսարանների հետ համատեղ հետազոտական ծրագրերի իրականացում, համագործակցության խթանում,
- նոր ճարտարագիտական ընկերությունների և աշխատատեղերի ստեղծման խթանում,
- ճարտարագիտական ձեռնարկությունների աքսելերացիա, արտադրողականության և արտահանման ծավալների մեծացում,
- որակյալ աշխատուժի` բարձր տեխնոլոգիաների մասնագետների, ճարտարագետների պատրաստում:
Ինժեներական քաղաքում գործունեության հիմնական ոլորտներն են՝
- Ավտոմոբիլային արդյունաբերություն,
- 5-րդ սերնդի բջջային կապ,
- միկրոսխեմաների մշակում,
- միկրոէլոկտրոնիկա,
- արդյունաբերական իրերի ինտերնետ (Industrial IoT),
- ռադիոէլեկտրոնային համակարգեր և համալիրներ,
- կենսաբժշկական ճարտարագիտություն և այլն։
Ինժեներական քաղաքն ապահովված է մշտապես թարմացվող առաջատար ինժեներական սարքավորումներով, հետազոտական և նախատիպային լաբորատորիաներով, հաստոցաշինական և արտադրական մեքենաներով, որոնք հասանելի են ինչպես ԻՔ-ում գործող, այնպես էլ ինժեներական և բարձր տեխնոլոգիական ոլորտի այլ ընկերությունների համար:
Ինժեներական քաղաքում գործունեություն ծավալելու և Ռեզիդենտի կարգավիճակ ստանալու պայմաններին և ընթացակարգին կարող եք ծանոթանալ այստեղ։
Ինժեներական քաղաքի ինժեներական բիզնես աքսելերատորի շենքում հասանելի են լինելու նաև վարձակալության հիմքով տարածքներ, որոնք հնարավորություն կտան նոր ձևավորվող ինժեներական և բարձր տեխնոլոգիական ոլորտի ընկերություններին գործունեություն ծավալել ԻՔ-ում և օգտվել ԻՔ-ում գործող բոլոր հնարավորություններից։
|
|
|
|
