ՀՐԱՎԵՐ

Ինժեներական քաղաքի Բարձր տեխնոլոգիական աքսելերատորի աստիճանահարթակի գեղարվեստական նկարազարդման գաղափարների

«Ձեռնարկությունների ինկուբատոր» հիմնադրամը հայտարարում է Ինժեներական քաղաքի Բարձր տեխնոլոգիական աքսելերատորի աստիճանահարթակի պատերի գեղարվեստական նկարազարդման (մյուրալ) գաղափարների հրավեր, որի նպատակն է ստեղծել ժամանակակից, յուրօրինակ և ոգեշնչող արվեստի գործ, որը կհարստացնի Ինժեներական քաղաքի միջավայրը և կդառնա բարձր-տեխնոլոգիական համայնքի ինքնության կարևոր բաղադրիչ՝ միավորելով արվեստը, տեխնոլոգիան և ստեղծարարությունը մեկ միջավայրում։

Ո՞վ կարող է մասնակցել

Հրավերը բաց է ինչպես պրոֆեսիոնալ, այնպես էլ սկսնակ նկարիչների, դիզայներների, իլյուստրատորների և պարզապես արվեստասերների համար։

Մասնակցել կարելի է և՛ անհատապես, և՛ թիմով։

Ընդունվող աշխատանքների թեմատիկ ուղղությունները

Աշխատանքները կարող են ներկայացվել տարբեր գեղարվեստական ոճերով, ներառելով, բայց չսահմանափակվելով հետևյալ ուղղություններով՝

Ժամանակակից արվեստ (Contemporary Art),
Աբստրակտ արվեստ,
Գրաֆիկական և վեկտորային ոճ,
Ֆուտուրիստական և տեխնոլոգիական պատկերներ,
Գիտության և նորարարության թեմաներ,
Ինժեներական և տեխնոլոգիական լուծումներ,
Կիբեռտարածություն և արհեստական բանականություն,
Տիեզերք և ապագայի քաղաքներ,
Հայկական ինքնություն և տեխնոլոգիական զարգացում,
Մինիմալիստական կամ կոնցեպտուալ արվեստ։
և այլն

* Գաղափարի ստեղծման ընթացքում Արհեստական բանականության գործիքների կիրառությունը սկզբունքորեն չի արգելվում։

Ինչպե՞ս դիմել

Մասնակցության համար անհրաժեշտ է լրացնել սույն առցանց հայտաձևը, ներկայացնելով նաև՝

Գաղափարի էսքիզը JPG, PNG կամ PDF ձևաչափով*
Գաղափարի համառոտ նկարագրությունը (մինչև 300 բառ)
Գաղափարի իրականացման համար կիրառելի տեխնոլոգիան և նյութերը
Հեղինակի կամ թիմի մասին կարճ տեղեկություն

*Ընտրված գաղափարի հեղինակը հետագայում պետք է ներկայացնի նաև SVG ձևաչափի ֆայլը

Գնահատման սկզբունքները

Ներկայացված գաղափարները կգնահատվեն ինչպես ինքնատիպության և ստեղծարարության, այնպես էլ Ինժեներական քաղաքի արժեքներին և միջավայրին համապատասխանության և իրագործելիության տեսանկյունից՝ տեխնոլոգիական և արվեստի ոլորտի ներկայացուցիչներից ձևավորված հանձնախմբի կողմից։

Ի՞նչ կստանա ընտրված գաղափարի հեղինակը

Ձեր ստեղծագործական գաղափարը կոգեշնչի հազարավոր այցելուների և կդառնա Ինժեներական քաղաքի միջավայրի անբաժանելի մասը։

Բացի այդ՝ որպես հաղթող գաղափարի հեղինակ, հնարավորություն կստանաք անվճար օգտվելու ստորև ներկայացված առաջարկներից որևէ մեկից՝ Ձեր ընտրությամբ (փոխհամաձայնեցված ժամկետներում և ձևաչափով)․

Ինժեներական քաղաքի տարածքում անհատական 1 ցուցահանդեսի կազմակերպում,
Բարձր տեխնոլոգիական աքսելերատորի սրահներից մեկում մասնագիտական 1 միջոցառման անցկացում (մինչև 80 անձի մասնակցությամբ),
Բարձր տեխնոլոգիական աքսելերատորի համատեղ աշխատանքային գոտուց (co-working space) 1 ամիս օգտվելու հնարավորություն (թիմի դեպքում՝ մինչև 3 անձի համար)։

Գաղափարի իրականացումը

Իրականացման ձևաչափն ու սկզբունքները հավելյալ կքննարկվեն ընտրված գաղափարի հեղինակ/ներ/ի հետ՝ պահպանելով հեղիանակային իրավունքի պաշտպանության սկզբունքները։

Նկարազարդման ենթակա տեղանքի լուսանկարները կարող եք գտնել այստեղ։

Տեղանքին անձնապես ծանոթանալու համար կարող եք այցելել ք․ Երևան, Բագրևանդի փ․ 52/26 հասցեով, Ինժեներական քաղաքի բարձր տեխնոլոգիական աքսելերատոր՝ նախապես զանգահարելով 011219797: