Ընթացիկ Նորություններ

Սիլիկոնյան հովտում կկայանա Հայաստան ՏՏ ֆորումը

30.05.2016

Սիլիկոնյան հովտում կկայանա ‹‹Հայաստան ՏՏ ֆորումը››

Մայիսի 30-ին ՀՀ էկոնոմիկայի նախարարությունում տեղի է ունեցել մամուլի ասուլիս՝ նվիրված Սիլիկոնյան հովտում անցկացվող ‹‹Հայաստան ՏՏ ֆորումին››:

Ասուլիսի բանախոսներն էին՝

• ՀՀ էկոնոմիկայի նախարարի տեղակալ Էմիլ Տարասյանը
• «Ձեռնարկությունների ինկուբատոր հիմնադրամի» տնօրեն Բագրատ Ենգիբարյանը
• Տեղեկատվական և հաղորդակցության տեխնոլոգիաների գործատուների միության նախագահ Արմեն Բալդրյանը
• Ինֆորմացիոն տեխնոլոգիաների ձեռնարկությունների միության վարչության նախագահ Ալեքսանդր Եսայանը
• «Սինոփսիս Արմենիա» ՓԲԸ գործադիր տնօրեն Հովիկ Մուսայելյանը:

Բանախոսները հայտարարեցին հունիսի 10-ին, Սիլիկոնյան հովտում /ԱՄՆ/, Սինոփսիս Մաունթին Վյու կամպուսում կայանալիք ‹‹Հայաստան. ՏՏ ֆորումի›› անցկացման մասին: Ֆորումի նպատակն է ներկայացնել և քննարկել Հայաստանի ՏՏ ոլորտի զարգացման միտումները և դիրքավորման հեռանկարները միջազգային ասպարեզում, խթանել միջազգային համագործակցությունը և ներդրումների ներգրավումը, նպաստել ոլորտի մասնագետների միջև համագործակցության կայացմանը: ‹‹Հայաստան. ՏՏ ֆորումի›› ուշադրության կենտրոնում կլինեն նաև հայկական ստարտափների 

զարգացմանը վերաբերող հարցեր, ինչպես նաև կամփոփվեն Հայաստան-ԱՄՆ ՏՏ ոլորտի աքսելերացիոն ծրագրի արդյունքները: 

Միջոցառման օրակարգում ներառված են հետևյալ թեմաները. 

• Հայաստանի ՏՏ ոլորտի զարգացումները և հաջողության պատմությունները
• Նորաստեղծ ընկերությունների գլոբալ էկոհամակարգի ստեղծումը և կապը համաշխարհային շուկայի հետ
• Մարտահրավերները և ներդրումային հնարավորությունները Հայաստանում
• Կրթության դերը նորաստեղծ ընկերությունների ներուժը բացահայտելու գործում 

Միջոցառումն իրականացվում է ԱրմԹեքի շրջանակում՝ ՀՀ կառավարության, Համաշխարհային բանկի և ‹‹Ձեռնարկությունների ինկուբատոր»  հիմնադրամի կողմից` ‹‹Ձեռներեցության զարգացման և ղեկավարների վերապատրաստման կենտրոն» (CEED) հիմնադրամի և ‹‹Սինոփսիս» ընկերության աջակցությամբ: Գործընկերներն են` ‹‹Մայքրոսոֆթ», ‹‹ԱյԲիԷմ», ‹‹ՊիկսԱրթ», ‹‹Հյուլեթ-Փաքարդ» ընկերությունները, Ինֆորմացիոն տեխնոլոգիաների ձեռնարկությունների միությունը և ՏՀՏ գործատուների միությունը:   

Հետաքրքրված անձինք ֆորումին մասնակցելու համար կարող են գրանցվել հետևյալ հղումով՝ http://goo.gl/forms/NCsoTSSoLBnASM5g2:  

Վերադարձ