Ընթացիկ Նորություններ

ԱՍՊԻՐԱՆՏՆԵՐԻ ԱՋԱԿՑՈՒԹՅԱՆ ԾՐԱԳԻՐ

ՀԱՅՏԱՐԱՐՈՒԹՅՈՒՆ

Ասպիրանտների աջակցության ծրագիր

 

ՀՀ համալսարանների և գիտահետազոտական ինստիտուտների ասպիրանտները հրավիրվում են մասնակցելու PMI Science -ի աջակցությամբ Ձեռնարկությունների Ինկուբատոր Հիմնադրամի կողմից իրականացվող Ասպիրանտների աջակցության ծրագրին (PhD Support Program)։

ՀԵՏԱԶՈՏԱԿԱՆ ԱՇԽԱՏԱՆՔՆԵՐԻ ՖԻՆԱՆՍԱՎՈՐՄԱՆ ԾՐԱԳԻՐ

ՀԱՅՏԱՐԱՐՈՒԹՅՈՒՆ

Հետազոտական Աշխատանքների Ֆինանսավորման Ծրագիր

ՀՀ համալսարանների և գիտահետազոտական ինստիտուտների հետազոտական  թիմերը հրավիրվում են մասնակցելու PMI Science -ի աջակցությամբ Ձեռնարկությունների ինկուբատոր հիմնադրամի կողմից   իրականացվող Հետազոտական աշխատանքների ֆինանսավորման (Faculty Research Funding) ծրագրին։

Արմթեք 2013 Հայաստանի բարձր տեխնոլոգիաների համաժողով

04.10.2013


Արմթեք 2013 Հայաստանի բարձր տեխնոլոգիաների համաժողով Երևանի մաթեմատիկական մեքենաների գիտահետազոտական ինստիտուտ

4 հոկտեմբերի, 2013


Ս.թ. հոկտեմբերի 4-ին Երևանի մաթեմատիկական մեքենաների գիտահետազոտական ինստիտուտում Հայաստանի Հանրապետության վարչապետ Տիգրան Սարգսյանի բարձր հովանու ներքո կայացավ Արմթեք 2013  Հայաստանի բարձր տեխնոլոգիաների 6-րդ ամենամյա համաժողովը: Համաժողովը նպատակ ունի աջակցել Հայաստանի բարձր տեխնոլոգիաների ոլորտի շարունակական զարգացմանը՝ միաժամանակ խթանելով միջազգային գործարար կապերի ամրապնդումը և ներդրումների հետագա աճը: ԱրմԹեք 2013-ը հնարավորություն կտա նաև հայտնաբերել գործարար և ներդրումային նոր հնարավորություններ, ստեղծել նոր կապեր և ընդլայնված մասնագիտական ցանց:


Համաժողովի ընթացքում տեղի ունեցան երեք քննարկումներ հետևյալ թեմաներով`

  • «Բարձր տեխնոլոգիաների ոլորտը Հայաստանում` վերջին զարգացումները և հաջողության պատմություններ», որը վարում էր «Սինոփսիս» ընկերության փոխնախագահ, հայաստանյան մասնաճյուղի գլխավոր գործադիր տնօրեն Ռիչ Գոլդմանը,
  • «Հետազոտություններ, նորարարություն և մասնագիտական զարգացում», որը վարում էր ՀՀ կրթության և գիտության նախարար Արմեն Աշոտյանը և
  • «Մարտահրավերներ, հնարավորություններ և հաջողության գործոններ», որը վարում էր ՀՀ էկոնոմիկայի նախարար Վահրամ Ավանեսյանը:

Համաժողովին ելույթով հանդես եկան ՀՀ վարչապետ Տիգրան Սարգսյանը, ԱՄՆ արտակարգ և լիազոր դեսպան Ջոն Հեֆերնը, ինչպես նաև պետական մարմինների, գիտական և կրթական հաստատությունների և մասնավոր հատվածի  հեղինակավոր ներկայացուցիչներ Հայաստանից, ԱՄՆ-ից, Ռուսաստանից, Եվրոպայի, ԱՊՀ և այլ երկրներից: Համաժողովին նաև մասնակցում են խոշորագույն վերազգային կազմակերպությունների ներկայացուցիչներ, ինչպիսիք են Rostelecom, IBM, Cisco, D-Link, Mentor Graphics, National Instruments, UNIDO և այլն:


Համաժողովի շրջանակում ստորագրվեցին հուշագրեր` տեխնոլոգիական ոլորտում պետություն-մասնավոր հատված համագործակցությամբ նոր նախաձեռնությունների շուրջ համագործակցության վերաբերյալ, մասնավորապես`

  • «ՋԻԷՆՍԻ-ԱԼՖԱ» ՓԲԸ և «Ձեռնարկությունների ինկուբատոր» հիմնադրամի միջև` երիտասարդների մոտ նոր տեխնոլոգիաների նկատմամբ հետաքրքրության աճի, բնակչության շրջանում համացանցի և համակարգչի օգտագործման ծավալների մեծացման, կարողությունների զարգացման յուրօրինակ միջավայրի ձևավորման խթանման, ինչպես նաև Գյումրու տեխնոլոգիական կենտրոնի տարածքում համատեղ լաբորատորիայի հիմնման ուղղությամբ համագործակցության մասին,
  • «Դիջիթըլ Փոմըգրանեթ» ՍՊԸ (“ITECHNOLOGY”) և «Ձեռնարկությունների ինկուբատոր» հիմնադրամի միջև` կրթության, մասնագետների վերապատրաստման, նոր աշխատատեղերի ստեղծման, ինչպես նաև Գյումրու տեխնոպարկի վերաբերյալ հանրային իրազեկման կազմակերպման և իրականացման ուղղությամբ համագործակցության վերաբերյալ:

Համաժողովի կազմակերպիչներն ու գործընկերներն են` Հայաստանի Հանրապետության կառավարությունը, Ձեռնարկությունների ինկուբատոր հիմնադրամը, ԱՄՆ Միջազգային զարգացման գործակալության Ձեռնարկությունների զարգացման և շուկայի մրցունակության («Ի-Դի-Էմ-Սի») ծրագիրը, Սինոփսիս Արմենիա-ն, Վիասֆեր տեխնոպարկը, Հայկական զարգացման գործակալությունը, Ազատ տնտեսական գոտի ալյանսը, Հայ-ամերիկյան առևտրի պալատը և G2iA ընկերությունը: Համաժողովի հովանավորն է Ռոստելեկոմ ընկերությունը: 


«Արմթեք 2013»-ը առաջին անգամ ընթացավ ԴիջիԹեք Էքսպո 2013 ցուցահանդեսին զուգահեռ, որին մասնակցում են տեղական, կանադական, սինգապուրյան, ռուսական և ամերիկյան 120 կազմակերպություններ:




Վերադարձ
Պատկերասրահ | Մեր մասին | Ծրագրեր | Ծառայություններ | Նորություններ | Հետազոտություններ | ՈՒղեցույցեր | Կապ | ԲԼՈԳ